السبت، 2 فبراير 2013

شالو رئيس وجابو رئيس بقلم أسماء محمد محمد

 شالو رئيس وجابو رئيس بقلم أسماء محمد محمد




شالو رئيس وجابو رئيس
**********************
شالو رئيس وجابو رئيس
قولنا اهو هنعيش
لكن المعارضه
فتحت علينا هويس
من الشر ومن المهاوييس
والله تعبنا م التهييس
ورئيس سابق أيامه خنوع
موت شعــــبة ياناس م الجـوع
ورئيس حالى
قالوا عليه غير مشروع
لكنه نجح بالصندوق
وكنت فاكره ميزان العدل
بين اديه راح يتعدل
لكنه مال وانقسم
كل كفه شايله للتانيه الكفن
كفه تقول بين اديه نعم
وكفه تقول لأ وألف لأ
ولاختياركم ليه
هيكون مصيركم ندم
وأعد الأتنين يحاربوا بعض
وكل يوم ضرب وسحل
وجثث شبابك يا مصر
بقت علو الهرم
وكل طرف م التانى اتظلم
نسيوا ان البلد واحد
والكل بأنانيته
على نفسه انقسم
والعنف ع الوشوش اترسم
وبين الكفوف اتفرض
والقلوب إحساسها مات
فى زمن الكل فيه بيقول هات
والأنانيه بقت عنوان
لشوارع بلدى
وخلاص ضاع الأمان
والشريف أصبح مهان
والحرامى كبيرو سنتين
ف سجن جميل محروس م العين
والحريه لمساكين بلدى
بقت حلم جميل
يشفوه بالليل
لما يناموا ليل طويل
بس يا عينى لما طالوها
افتكروها عصفور جميل
وعشان ما يطير منهم
قصقصو ريشوا
وعلى نغم السلام الوطنى
دبحو العصفور
أما الصبح يا عينى علينا
نشيل الهم وننسى الحلم
اللى حلمناه
وعلى حدود السما رسمناه
وطول اليوم نحكى
شالو رئيس وجابو رئيس

بقلم أسماء محمد محمد
                                                       

 

 

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ